Үйл явдал
ОХУ: Монгол Улсад нийлүүлэх шатахууны нийлүүлэлт хэвийн үргэлжилнэ
ОХУ 2026 оны дөрөвдүгээр сарын 1-нээс эхлэн бензиний экспортыг түр хугацаанд хязгаарлах шийдвэр гаргасан талаар ОХУ-ын төрийн мэдээллийн ТАСС агентлаг мэдээллээ.
Тус шийдвэрийн дагуу бензиний экспортын хориг долоодугаар сарын 31 хүртэл үргэлжлэх бөгөөд дотоодын шатахууны зах зээлийг тогтворжуулах, улирлын эрэлтийг хангах зорилготой гэж ОХУ-ын Засгийн газрын эх сурвалжууд тайлбарласан байна. Хөдөө аж ахуйн улирал эхэлж буйтай холбоотойгоор дотоодын шатахууны эрэлт нэмэгдэх төлөвтэй байгаа нь ийм шийдвэр гаргахад нөлөөлжээ.
Олон улсын Reuters агентлагийн мэдээлснээр, ОХУ өмнө нь мөн ижил төрлийн хязгаарлалт хийж байсан бөгөөд энэ нь бүс нутгийн шатахууны зах зээлд тодорхой хэмжээгээр нөлөөлж байсан юм. ОХУ нь дэлхийн томоохон шатахуун экспортлогч орнуудын нэг бөгөөд ялангуяа Төв Ази, Кавказ болон Африкийн зарим оронд бензиний нийлүүлэлтэд чухал байр суурь эзэлдэг.
Шинжээчдийн үзэж буйгаар ОХУ бензиний экспортоо түр хязгаарласнаар дэлхийн шатахууны зах зээлд нийлүүлэлт буурч, үнийн өсөлтөд дарамт үүсэх магадлалтай. Ялангуяа ОХУ-аас шатахуун импортолдог орнууд өөр эх үүсвэр хайх шаардлагатай болж, бүс нутгийн шатахууны үнэ хэлбэлзэх эрсдэл нэмэгдэх төлөвтэй байна.
Мөн Ойрхи Дорнод дахь хурцадмал байдал, Персийн булангийн бүсийн тодорхойгүй нөхцөлтэй давхцаж байгаа нь дэлхийн эрчим хүчний зах зээлд давхар нөлөө үзүүлэхээр байна. Персийн булан нь дэлхийн газрын тосны нийлүүлэлтийн чухал бүс нутаг тул ОХУ-ын шатахууны экспортын хязгаарлалттай зэрэгцэн зах зээлийн эрсдэл нэмэгдэж болзошгүй гэж шинжээчид үзэж байна.
ТАСС агентлагийн мэдээлснээр Монгол Улсад нийлүүлэх шатахууны нийлүүлэлт Засгийн газар хоорондын гэрээний хүрээнд үргэлжилж, нийлүүлэлтэд шууд нөлөөлөхгүй гэж ОХУ-ын тал мэдэгджээ.
ОХУ-ын энэхүү шийдвэр нь дэлхийн шатахууны зах зээлд тодорхойгүй байдал нэмэгдсэн энэ үед гарч буйгаараа анхаарал татаж байна. Шинжээчдийн үзэж буйгаар нийлүүлэлтийн хязгаарлалт үргэлжилбэл шатахууны үнэ өсөх, бүс нутгийн зах зээлд савлагаа үүсэх эрсдэл нэмэгдэх төлөвтэй байна.
Үйл явдал
Улаанбаатар хотод 450 км дугуйн замын сүлжээ бий болгоно
Нийслэлийн Засаг дарга бөгөөд Улаанбаатар хотын Захирагч Б.Пүрэвдагва Монголын дугуйн холбооны төлөөллүүдийг хүлээн авч уулзлаа. Уулзалтаар Улаанбаатар хотод дугуйн спортыг хөгжүүлэх, дэд бүтцийн асуудлыг шийдвэрлэх, иргэдийн идэвхтэй, эрүүл амьдралын хэв маягийг дэмжих чиглэлээр санал солилцлоо.
Нийслэлийн Засаг дарга бөгөөд Улаанбаатар хотын Захирагч Б.Пүрэвдагва “Нийслэлийн дугуйн замыг нэмэгдүүлж, дугуй унаж буй хүмүүст ээлтэй хотыг бий болгох зорилгоор энэ жил 76 км дугуйн зам барьж байгууллаа. Ирэх жил 115 км дугуйн замыг нэмж, Улаанбаатар хотын нийт дугуйн замын сүлжээг 450 км хүргэнэ. Ингэснээр Өнөр хорооллоос Амгалан хүртэл дугуйгаар зорчих нөхцөлийг бүрдүүлэх юм. Олон улсын хотуудын жишгээр Туул голыг дагасан экосистем цэцэрлэгт хүрээлэн, дугуйн зам, явган хүний зам, гүйлтийн замтайгаар хийгдэнэ. Зайсангаас төв талбай хүрэх гүүрэн байгууламжтай дугуйн замыг 2027 онд барихаар М-Си-Эс групптэй зөвшилцсөн. Нийслэл дугуй унах, дугуйн спортыг дэмжинэ” гэлээ.
Монголын дугуйн холбооны ерөнхийлөгч Б.Гүрсоронзон “Нийслэл олон км дугуйн замыг бодлогоор барьж байгаад нийт дугуйчид болон дугуй сонирхогч залуусын өмнөөс талархал илэрхийлье. Монголын дугуйн холбоо нийтийн биеийн тамирыг хөгжүүлэх, замын хөдөлгөөний аюулгүй байдлыг сурталчлах чиглэлээр гол ажлуудаа хийж байна. Олон улсын жишгийг хангасан дугуйн спортын тэмцээн, уралдаан зохион байгуулна. Өнгөрсөн наймдугаар сард Цонжинболдогт “Gravel Gran Fondo Ulaanbaatar 2026 & Yam Trail Run” олон улсын дугуйн тэмцээнийг зохион байгуулсан. Энэ тэмцээнийг 2027 оны наймдугаар сард мөн хийнэ. Одоогийн байдлаар 20 орчим гадаадын тамирчин оролцох хүсэлтээ илэрхийлсэн” гэв.
Үйл явдал
Нийслэлийн хэмжээнд 16 мянган тонн давс, бодис нөөцлөөд байна
Өвөлжилтийн бэлтгэл ажлын нэгдсэн төлөвлөгөөнд 573 ажил тусгаснаас хэрэгжилт 90 хувьтай байна. Давс 10016 тонн, бодис 6140 тонныг нөөцөлсөн. Нэмэлтээр 1000 тонн давс, 1500 тонн бодис худалдан авахаар тендер зарлаад байна.
Мөн давс, бодис цацагч 96, зам цэвэрлэгээний 432 тусгай зориулалтын машин, техникийн бэлэн байдлыг хангаад байна. Нийслэлийн хэмжээнд тохижилт үйлчилгээний чиглэлээр 48 байгууллага үйл ажиллагаа явуулдаг. Үүнээс зам, талбайн цэвэрлэгээ үйлчилгээ явуулдаг орон нутгийн төсөвт 17, хувийн хэвшлийн 20 байгууллага байна. Захирагчийн ажлын албанаас “Өвөлд бэлэн үү” үзлэг, шалгалтыг эхлүүлсэн байна.
Үйл явдал
Нийслэлийн инженерийн шугам, сүлжээний өвөлжилтийн бэлтгэл 94 хувьтай байна
Нийслэлийн 2026-2027 оны өвөлжилтийн бэлтгэлийг хангах хүрээнд инженерийн хангамжийн байгууллага, харьяа газар, дүүргүүд нийт 573 төсөл, арга хэмжээ хэрэгжүүлж байна. Өнөөдрийн байдлаар инженерийн шугам, сүлжээний бэлтгэл 94 хувьтай байна.
Инженерийн шугам сүлжээний засвар, шинэчлэл, өргөтгөл бүрэн дууссан. Орон сууцны хороолол доторх салбар шугамын гэмтэл засварлах, бараа материал худалдан авах ажил дуусах шатандаа явж байна.
УБЗАА-ны Хотын инженерийн дэд бүтцийн газрын дарга Л.Алтангэрэл “2025-2026 онд Улаанбаатар хотын хэмжээнд нийт 57.3 км инженерийн шугам сүлжээг өргөтгөн шинэчилсэн. Тухайлбал, 16 байршилд 18.7 км дулааны гол шугам сүлжээ болон орон сууцны хороолол доторх 16.1 км шугамд өргөтгөл, шинэчлэлийн ажил хийсэн. Мөн бохир усны “Туул-1” коллекторын 6 км шугам, борооны ус зайлуулах 17.1 км шугамыг шинээр угсраад байна” гэв.
-
Үйл явдал2026/07/30
Агаарын тээврийн зорчигчдын тоо эхний хагас жилд 1.2 саяд хүрчээ
-
Дэлхий нийтээр..2024/01/11
Ерөнхий сайд Л.Оюун-Эрдэнэ Дэлхийн эдийн засгийн чуулганд оролцоно
-
Дэлхий нийтээр..2023/01/18
Нотлох баримтыг шинжлэн судлах сонсголд 31 гэрч дуудсан байна
-
Дэлхий нийтээр..2025/10/23
Шөнийн тарифын хөнгөлөлт 11 дүгээр сарын 1-нээс эхэлнэ