Дэлхий нийтээр..
Сингапур улс руу зорчих иргэдийн анхааралд!
Сингапур Улс коронавируст халдвар /Ковид-19/-ын тархалтын ногоон түвшинд шилжсэнтэй холбогдуулан 2023 оны 2 дугаар сарын 13-ны өдрөөс эхлэн тус улс руу зорчих зорчигчдоос коронавируст халдвар /Ковид-19/-ын эсрэг дархлаажуулалтын вакцины гэрчилгээ болон коронавируст халдвар /Ковид-19/-ын шинжилгээний хариу шаардахгүй боллоо. Зорчигчид зөвхөн тус улсад ирэхээс 72 цагийн дотор доорх холбоосоор нэвтэрч “SG Arrival Card” мэдүүлгийг бөглөн хэвлэж биедээ авч явах шаардлагатай юм.
Мэдүүлэг бөглөх холбоос:
https://www.ica.gov.sg/enter-transit-depart/entering-singapore/sg-arrival-card
Сингапур Улсад руу зорчих иргэдийн хөдөлгөөн нэмэгдэж байгаатай холбогдуулан тус улс руу зорчихоор төлөвлөж буй иргэдэд дараах зөвлөмжийг хүргэж байна.
- Гадаад паспортын хүчинтэй хугацаа хамгийн багадаа 6 сарын хүчинтэй байх, аяллын хоёр талын нислэгийн тийзийг баталгаажуулан худалдан авсан байх.
- Тус улс руу нэвтрэх зөвшөөрлийг хилийн шалган нэвтрүүлэх цэгт Цагаачлал, шалган нэвтрүүлэх албаны байцаагч олгодог тул аяллын хөтөлбөр, зочид буудлын баталгаажсан захиалга зэрэг бусад шаардлагатай баримт бичгүүдийг биедээ авч явах.
- Визгүй зорчих 30 хоногийн хугацааг хэтрүүлэхгүй байх. Визний хугацааг 90 хүртэлх хоногоор хэтрүүлсэн тохиолдолд 4,000 хүртэлх сингапур доллараар торгох эсвэл 6 сарын хугацаатай хорих шийтгэл оногдуулдаг болно.
- Хилээр нэвтрүүлэхийг хориглосон эд зүйлс, бараа бүтээгдэхүүн тухайлбал, бохь, зажилдаг тамхи, хамрын тамхи, усан тамхи, цахилгаан тамхи, никотин болон тамхины ургамал агуулсан аливаа төрлийн бүтээгдэхүүн, галт зэвсэг, хутга, бууны хэлбэртэй тамхины асаагуур, чүдэнз, мансууруулах бодис, сэтгэцэд нөлөөлөх эм, бэлдмэл, тэсэрч дэлбэрэх бодис, садар самуун бүхий ном, сонин, сэтгүүл, видео бичлэг, зохиогчийн эрхийг зөрчиж хуулбарласан ном, сэтгүүл, бичлэг, эмчийн жоргүй эм, бэлдмэл, нэн ховордсон биологийн төрөл зүйл болон тэдгээрээс гаргаж авсан бүтээгдэхүүн, үслэг эдлэл зэрэг бараа бүтээгдэхүүнийг биедээ болон ачаа тээшиндээ авч явахгүй байх.
Мансууруулах бодис, сэтгэцэд нөлөөлөх эм, бэлдмэлийг Сингапур Улс руу нэвтрүүлэхийг завдах, тээвэрлэх, худалдаалах, ашиглахыг тус улсад хатуу хориглодог бөгөөд дээрх гэмт хэрэгт цаазын ял оноодог болно. Иймд, бусдын эд зүйлсийг авахгүй байх, өөрсдийн гар цүнх, ачаа тээшийн бүрэн бүтэн байдлыг нягталж, сайтар шалгах.
Хилээр нэвтрүүлэхийг хориглосон бараа бүтээгдэхүүний талаарх дэлгэрэнгүй мэдээллийг доорх холбоосноос авах боломжтой:
https://www.ica.gov.sg/enter-transit-depart/entering-singapore/what-you-can-bring
- Сингапур Улсын хилээр орох, гарахдаа 20 мянгаас дээш хэмжээний сингапур доллар эсвэл түүнтэй тэнцэх хэмжээний валют бэлнээр биедээ авч яваа тохиолдолд гаалийн мэдүүлэгт /Physical Currency and Bearer Nogotiable Instruments Report, Form NP 727/ заавал мэдүүлж, мөнгөний эх үүсвэрийг тайлбарласан тайлан, нотлох баримтыг хавсаргана. Хэрэв мэдүүлээгүй тохиолдолд тухайн бэлэн мөнгийг хурааж авах зохицуулалттай болно.
Бэлнээр авч яваа 20 мянгаас дээш хэмжээний сингапур доллар эсвэл түүнтэй тэнцэх хэмжээний валютын эх үүсвэрийг худал мэдүүлсэн тохиолдолд 50,000 сингапур доллараар торгох эсвэл 3 жил хүртэлх хугацаагаар хорих ял оногдуулна.
Хилээр нэвтрүүлэх бэлэн мөнгө болон Physical Currency and Bearer Negotiable Instruments Report, Form NP 727 маягтын талаар дараах холбоосноос дэлгэрэнгүй мэдээлэл авах боломжтой.
https://www.ica.gov.sg/enter-transit-depart/at-our-checkpoints/for-travellers/CBNI
- Сингапур Улсын Хөдөлмөрийн яамнаас хөдөлмөр эрхлэх зөвшөөрөл аваагүй гадаадын иргэд /оюутнууд мөн адил/ ямар ч тохиолдолд тус улсад хөдөлмөр эрхлэх /цагийн ажил мөн адил хамаарна/ эрхгүй бөгөөд зөвшөөрөлгүй хөдөлмөр эрхэлсэн тохиолдолд 20,000 хүртэлх сингапур доллараар торгох эсвэл 2 жил хүртэлх хугацаатай хорих ялаар шийтгэдэг болно.
- Сингапур Улсын их, дээд сургуульд суралцаж буй гадаадын оюутнуудын хичээлийн ирцийн мэдээллийг Сингапур Улсын Цагаачлал, шалган нэвтрүүлэх алба сар бүр шалгадаг бөгөөд ирц хангалтгүй гадаадын оюутнуудын виз, оршин суух зөвшөөрлийг хүчингүй болгох эрхтэй.
- Суугаа улсын хууль, журмыг даган мөрдөж, гэмт хэрэг, зөрчилд холбогдохооc урьдчилан сэргийлж, нутгийн соёл, ёс заншилд хүндэтгэлтэй хандах. Тухайлбал, нийтийн тээврийн хэрэгсэлд юм идэх, уух, зөвшөөрөлгүй газарт тамхи татах, бусдын биед хүрэх, түлхэх, бусдын зургийг зөвшөөрөлгүй авах, эзэнгүй орхисон, гээгдсэн эд зүйлсэд гар хүрэх зэргийг хуулиар хориглодог болно.
Дэлхий нийтээр..
Польш улсын бага сургуулиудад гар утас ашиглахыг хориглохоор төлөвлөж байна
Польш улс бага сургуулийн сурагчдыг сургууль дээр гар утас ашиглахыг хориглох хуулийн төслийг хэрэгжүүлэхээр төлөвлөж байна. Польшийн Ерөнхий сайд Дональд Туск энэ сарын 2-нд мэдэгдэхдээ, 2026 оны есдүгээр сарын 1-нээс эхлэн 7-15 насны сурагчдыг сургууль дээр гар утас ашиглахыг хориглохоор ажиллаж байгаагаа хэлжээ.
Засгийн газраас дэмжсэн хуулийн төсөлд бага сургуулийн сурагчдыг хичээлийн үеэр төдийгүй завсарлага, сургуулийн орчин, мөн сургуулиас зохион байгуулсан боловсролын үйл ажиллагааны үеэр гар утас ашиглахыг хориглохоор тусгасан байна. Ухаалаг цаг зэрэг мэдээлэл, харилцааны боломжтой төхөөрөмжүүд ч уг хязгаарлалтад хамрагдахаар байна.
Гэхдээ сурагчид төхөөрөмжөө сургууль дээр авчрах боломжтой бөгөөд сургуулиуд тэдгээрийг хичээлийн хугацаанд хадгалах тусгай байр, зохицуулалт хийх эрх зүйн үндэстэй болох аж.
Польшийн бага сургуулийн боловсрол найман жил үргэлжилдэг бөгөөд 7-15 насны хүүхдүүд хамрагддаг. Хуулийн төсөл цаашид Польшийн парламентын доод танхим болох Сейм, дээд танхим болох Сенатаар хэлэлцэгдэж, батлагдсаны дараа Ерөнхийлөгч гарын үсэг зурснаар хүчин төгөлдөр болох юм.
Ерөнхий сайд Дональд Туск хүүхэд, өсвөр үеийнхний гар утас, цахим платформ, тоглоомд донтох асуудал ноцтой болж, хичээлдээ төвлөрөх болон зан төлөвт сөргөөр нөлөөлж байгааг онцолсон байна.
Дэлхий нийтээр..
БНХАУ Тяньаньмэний үйл явдлыг дурсах арга хэмжээг хязгаарлажээ
БНХАУ-ын эрх баригчид 1989 оны Тяньаньмэний талбайн үйл явдлын 37 жилийн ойг тэмдэглэх, дурсах оролдлогуудыг хязгаарласан байна. Эх сурвалжийн мэдээлснээр, Бээжин хотод амь үрэгдэгсдийн ар гэрийнхнийг ой тохиосон өдөр оршуулгын газарт очихыг зөвшөөрөөгүй байна. “Тяньаньмэний эхчүүд” хэмээх бүлгийн гишүүд олон жилийн турш уг өдөр төрөл төрөгсдийнхөө шарилд очиж, дурсгалын мэдэгдэл уншдаг байсан гэж “Эмнести Интернэшнл” мэдээлжээ.
1989 онд Бээжингийн Тяньаньмэний талбайд ардчилал, эрх чөлөөг шаардан жагссан оюутан, иргэдийн хөдөлгөөнийг Хятадын арми хүчээр тараасан юм. AP-ийн мэдээлснээр, тухайн үед олон зуун, магадгүй мянга гаруй хүн амь үрэгдсэн гэж үздэг.
Хонконгт мөн энэ өдрөөр аюулгүй байдлыг чангатгажээ. Урьд нь жил бүр лаа асаан дурсах томоохон арга хэмжээ болдог байсан Виктория паркийн орчимд цөөн хүн цугласан бөгөөд цагдаа нар хэд хэдэн хүнийг шалгаж, заримыг нь түр саатуулсан байна.
АНУ, Европын Холбоо, Их Британи энэ өдрийг тохиолдуулан мэдэгдэл гаргаж, өнгөрснийг цензурээр арилгах боломжгүй хэмээн онцолжээ. Харин БНХАУ-ын Гадаад хэргийн яам АНУ-ын мэдэгдлийг Хятадын дотоод хэрэгт хөндлөнгөөс оролцсон үйлдэл гэж шүүмжилсэн байна.
Мөн Тайваньд Тяньаньмэний үйл явдлын ойг тохиолдуулан лаа асаах дурсгалын арга хэмжээ зохион байгуулжээ. АНУ-ын Капитолын ордонд хууль тогтоогчид болон 1989 оны хөдөлгөөний төлөөлөгчид оролцсон дурсах арга хэмжээ болсон байна.
“Тяньаньмэний эхчүүд” бүлэг энэ жилийн ойг угтан шударга ёс шаардсан мэдэгдэл гаргаж, тухайн үед болсон үйл явдлын талаар бүрэн мэдээлэл ил болгох, хохирогчдын ар гэрт нөхөн төлбөр олгох, хариуцлага тооцохыг шаарджээ.
Дэлхий нийтээр..
Индонезид авлигын хэрэгтэй холбоотойгоор өндөр албан тушаалтнуудыг баривчилжээ
Индонезид авлигын эсрэг ажиллагаа эрчимжиж, Засгийн газрын өндөр албан тушаалтнуудыг баривчилжээ. “Аль Жазира”-гийн мэдээлснээр, тус улсын Цагаачлалын асуудал эрхэлсэн дэд сайд Силми Каримыг цагаачлалын бичиг баримтын бүрдүүлэлт, удирдлагатай холбоотой зөрчил гаргасан байж болзошгүй хэргээр саатуулсан байна. Түүнийг Авлигатай тэмцэх комиссын байранд 10 орчим цаг байцаасны дараа баривчилжээ.
Авлигатай тэмцэх комиссын төлөөлөгч Будии Прасетьогийн мэдээлснээр, уг хэрэг 2023-2024 онд Силми Карим тухайн үеийн Ерөнхийлөгч Жоко Видодогийн засаг захиргаанд Цагаачлалын асуудал эрхэлсэн ерөнхий захирлаар ажиллаж байх үед гарсан байж болзошгүй аж. Мөн энэ хэрэгт холбогдуулан өөр долоон сэжигтнийг тогтоосон гэж мэдэгдэв.
Үүнээс нэг өдрийн өмнө Индонезийн Ерөнхий прокурорын газар Ерөнхийлөгч Прабово Субиантогийн хүүхдийн хоол тэжээлийн дутагдалтай тэмцэх үнэгүй хоолны хөтөлбөрийг хариуцаж байсан Үндэсний хоол тэжээлийн агентлагийн дарга асан Дадан Хиндаяанаг авлигын хэрэгт холбогдуулан баривчилжээ. Тус хэрэгт мөн хоёр хүнийг саатуулсан байна.
Мөрдөн шалгах байгууллагын мэдээлснээр, үнэгүй хоолны хөтөлбөрийг сургуулиудад үйл ажиллагаа явуулдаг сангуудаар дамжуулан хэрэгжүүлдэг бөгөөд эдгээр санг хууль бус үйл ажиллагаанд ашигласан байж болзошгүй гэж үзэж байгаа юм.
Индонезийн Төрийн нарийн бичгийн дарга Прасетьо Хади сүүлийн хоёр өдөр дараалан өндөр албан тушаалтнууд авлигын хэрэгт холбогдсонд Засгийн газар санаа зовниж буйгаа илэрхийлжээ. Тэрбээр Авлигатай тэмцэх комисс болон Ерөнхий прокурорын газрын явуулж буй хуулийн ажиллагааг Засгийн газар хүндэтгэнэ гэж мэдэгдсэн байна.
Индонезид сүүлийн саруудад авлигын эсрэг ажиллагаа идэвхжиж, өнгөрсөн дөрөвдүгээр сард тус улсын Омбудсманы ерөнхий дарга албан тушаалдаа томилогдоод зургаахан хоногийн дараа хээл хахуулийн хэрэгт холбогдон баривчлагдсан юм.
