Дэлхий нийтээр..
Аппле компанийн авлигын эсрэг иж бүрэн бодлого
Өнгөрсөн долоо хоногт Аппле компани нийцлийн өргөн хүрээтэй сэдвийн бодлогын баримт бичгүүдийн линк буюу холбоосыг агуулсан шинэ ёс зүй, нийцлийн сайтынхаа нээлтийг хийлээ. Тус компанийн авлигын эсрэг бодлогод зарим сонирхолтой заалтуудыг багтаасан байна.
1. Хөнгөвчлөх төлбөрт тавигдах хориг
Хөнгөвчлөх төлбөр нь Засгийн газраас байнга хэрэгжүүлдэг үйл ажиллагааны үед тохиолддог хээл хахуулийн төрөл юм. Ихэвчлэн анхан шатны түвшний үйл ажиллагааг гүйцэтгэж буй албан тушаалтнууд ийм төрлийн хөнгөлөлт, төлбөрийг авж, ердийн бөгөөд түгээмэл үйлчилгээг үзүүлдэг. Аппле компани ийм төлбөрийг зөвшөөрөхгүй бөгөөд хатуу хориглоно.
2. "Цуу ярианд учир бий." Гуравдагч этгээдтэй холбоотой тодорхой нөхцөл байдалд сэрэмжлүүлэх гурван анхааруулга.
Та гуравдагч этгээд болон туслан гүйцэтгэгч компаниудтай харилцахдаа доорх гурван анхааруулгыг санаж байх хэрэгтэй ба дараах зүйлсийн аль нэгийг олж мэдвэл сэрэмжлүүлэх хэрэгтэй:
o Хээл хахуулийн тухай цуу яриа гарах эсвэл нэр хүндээ хадгалах;
o Төрийн албан хаагчид эсвэл төрийн байгууллагуудтай холбоотой нэхэмжлэх, зардлын нэхэмжлэлийн талаархи нарийвчилсан мэдээлэл, тухайлбал тогтмол дүнтэй төлбөрийн хүсэлт, том дүнтэй төлбөрийн хүсэлт, эсвэл гуравдагч этгээд эсвэл өөр улсаар дамжуулан хийсэн төлбөр;
o Төрийн албан хаагч эсвэл яамтай ойрын холбоотой байх, эсвэл тусгай зөвлөх эсвэл нэмэлт үнэ цэнэ багатай зөвлөхөөр ажиллуулахыг шаардах.
3. Төрийн албан хаагч нь өргөн цар хүрээтэй ойлголт.
“Төрийн албан хаагч” гэж төрийн чиг үүргийг гүйцэтгэж, төрийн хөрөнгөөр цалинждаг хүнийг хэлнэ. Үүнд орон нутаг, муж/аймгийн удирдлага, үндэсний Засгийн газар, олон улсын байгууллагад ажилладаг хувь хүмүүс, төрийн өмчит сургууль, эмнэлгийн албан хаагчид, төрийн өмчит аж ахуйн нэгжийн ажилтнууд багтана. Ийм байгууллагын ажилтнуудыг ямар албан тушаалд ажиллаж байгаагаас үл хамааран төрийн албан хаагч гэнэ.
4. Төрийн албан хаагчдын хоолны зардлын хязгаарлалтыг улс бүрээр харуулсан хүснэгт.
АНУ-ын төрийн албан хаагчид болон албан тушаалтнуудад зарцуулах хоолны зардал нь АНУ-ын төрийн албан хаагчдын албан ажлаа гүйцэтгэх үеийн хоолны зөвшөөрөгдөх хязгаарыг улс бүрээр харуулсан хүснэгтэнд нийцсэн байх ёстой.
5. Төрийн албан хаагчдын томилолтын зардлыг зөвшөөрдөг боловч үүнийг урьдчилан баталсан байх ёстой.
Холбогдох хууль тогтоомжоор зөвшөөрөгдсөн нөхцөлд Аппле компани нь бүтээгдэхүүн, үйлчилгээг сурталчлах, танилцуулах, тайлбарлахтай шууд холбоотойгоор төрийн албан хаагчид болон албан тушаалтнуудын томилолтын зохих зардлыг төлж болно. Гэхдээ томилолтын зардлыг зохих журмын дагуу урьдчилан баталсан байх ёстой.
Дэлхий нийтээр..
Германы прокурорууд “Умардын урсгал”-ын халдлагыг Украины тал захиалсан гэж үзжээ
Германы прокурорууд 2022 онд “Умардын урсгал” хийн хоолойд гарсан дэлбэрэлттэй холбоотойгоор Украины армийн офицер асан этгээдэд яллах дүгнэлт үйлджээ. Түүнийг Украины төрийн байгууллагын нэрийн өмнөөс ажиллаж, хоолойг дэлбэлэх ажиллагаанд оролцсон гэж буруутгаж байна.
Германы хувийн мэдээлэл хамгаалах журмын дагуу Серхий К. гэж нэрлэгдсэн уг этгээдийг иргэний зориулалттай байгууламжид халдсан, дэлбэрэлт үүсгэсэн, дэд бүтэц сүйтгэсэн, нийтийн үйлчилгээг тасалдуулсан бүлэгт багтсан гэж үзжээ. Харин тэрбээр уг хэрэгт холбоогүй гэдгээ мэдэгдсэн байна.
Киевийн эрх баригчид Германы прокуроруудын мэдэгдэлд дэлгэрэнгүй тайлбар өгөх хангалттай мэдээлэл одоогоор байхгүй гэжээ. Украины Ерөнхийлөгч Владимир Зеленский яллах дүгнэлтийн талаар бүрэн мэдээлэл аваагүй тул одоогоор дүгнэлт хийхэд эрт байна гэж мэдэгдсэн байна.
Прокуроруудын мэдээлснээр Серхий К. нь 2022 оны есдүгээр сард шумбагчид, хөлгийн ахмад, тэсрэх бодисын мэргэжилтнээс бүрдсэн багийг удирдан Герман руу хуурамч бичиг баримтаар нэвтэрч, хөлөг түрээслэсэн гэж үзэж байна. Улмаар багийнхан Балтын тэнгист байрлах хоолойн хэсэгт тэсрэх төхөөрөмж байрлуулсан гэх үндэслэлээр шалгагдаж байна.
“Умардын урсгал”-ын дэлбэрэлт 2022 оны есдүгээр сард буюу Орос Украинд бүрэн хэмжээний довтолгоо эхлүүлснээс долоон сарын дараа болсон. Дэлбэрэлтийн улмаас Оросын байгалийн хийг Европ руу дамжуулах гол шугам болох “Умардын урсгал-1” гэмтэж, ашиглалтад ороогүй байсан “Умардын урсгал-2”-ын хэсэг мөн эвдэрсэн юм.
Германы тал уг хэргийг өөрийн харьяалалд хамаарна гэж үзэж байна. Учир нь гэмтсэн хоолойнууд Германы Мекленбург–Өрнөд Померани мужийн Любмин хотод хүрдэг бөгөөд Германы эрчим хүчний аюулгүй байдалд нөлөөлсөн гэж тайлбарлажээ.
Дэлхий нийтээр..
БНСУ-ын Ерөнхийлөгч И Жэ Мён Монгол Улсад төрийн айлчлал хийнэ
Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Солонгос Улсын Ерөнхийлөгч И Жэ Мён, гэргий Ким Хе Гён-ы хамт 2026 оны 07 дугаар сарын 09-11-ний өдрүүдэд Монгол Улсад төрийн айлчлал хийнэ.
Энэ айлчлал БНСУ-ын төрийн тэргүүн 2011 онд манай улсад айлчилснаас хойш 15 жилийн дараа болох юм.
Айлчлалын хүрээнд Ерөнхийлөгч У.Хүрэлсүх, И Жэ Мён нар албан ёсны хэлэлцээ хийж, “Стратегийн түншлэл”-ийн харилцааг өргөжүүлэн бэхжүүлэх, хамтын ажиллагааг эдийн засгийн агуулгаар баяжуулах болон олон улс, бүс нутгийн тавцан дахь хамтын ажиллагаа зэрэг чиглэлээр санал солилцоно.
Айлчлалын үеэр талууд харилцаа, хамтын ажиллагааг өргөжүүлэн хөгжүүлэхтэй холбоотой Засгийн газар болон байгууллага хоорондын баримт бичгүүдэд гарын үсэг зурахаар төлөвлөж байна.
БНСУ-ын Ерөнхийлөгч И Жэ Мён, гэргий Ким Хе Гён нар Үндэсний их баяр наадмын нээлтийн ёслолд хүндэт зочдын хувиар оролцоно.
Хоёр улс:
2006 онд “Сайн хөршийн, найрамдал, хамтын ажиллагааны түншлэл”
2011 онд “Иж бүрэн түншлэл”
2021 онд “Стратегийн түншлэл”-ийн харилцаа тогтоосон.
Монгол Улс, Бүгд Найрамдах Солонгос Улс 1990 оны 03 дугаар сарын 26-ны өдөр дипломат харилцаа тогтоосон. БНСУ 1990 онд Улаанбаатар хотноо, манай улс 1991 онд Сөүл хотноо Элчин сайдын яамаа нээжээ.
Дэлхий нийтээр..
Пакистан: Афганы хил орчимд явуулсан ажиллагаагаар 29 зэвсэгт этгээдийг устгасан гэж мэдэгдэв
Пакистаны аюулгүй байдлын хүчнийхэн Афганистантай залгаа хилийн бүсэд явуулсан хуурай замын ажиллагаа болон дараах агаарын цохилтын үеэр 29 зэвсэгт этгээдийг устгасан гэж тус улсын эрх баригчид мэдэгдлээ.
Пакистаны Мэдээллийн сайд Аттаулла Тарарын мэдээлснээр, уг ажиллагааг сүүлийн үед тус улсын нутаг дэвсгэрт гарсан хэд хэдэн зэвсэгт халдлагын хариу арга хэмжээ болгон зохион байгуулжээ. Тэрбээр ажиллагааны үеэр зэвсэгт бүлэглэлүүдийн байрлаж байсан нуугдах газар, баазуудад чиглэсэн цохилт өгсөн гэж мэдэгдсэн байна.
Энэхүү ажиллагаа нь Карачи хот дахь Пакистаны хилийн цэргийн төв байр руу зэвсэгт халдлага үйлдэгдсэний дараахан болсон юм. Уг халдлагын улмаас гурван цэргийн алба хаагч амь үрэгдэж, хэд хэдэн хүн шархадсан бөгөөд халдлагын хариуцлагыг Пакистаны Талибантай холбоотой Жамаат-ул-Ахрар бүлэглэл хүлээжээ.
Сүүлийн жилүүдэд Пакистаны баруун хойд бүсэд зэвсэгт халдлагын тоо эрс нэмэгдэж, тус улсын эрх баригчид ихэнх халдлагыг Пакистаны Талибан (TTP) болон түүнтэй холбоотой бүлэглэлүүдтэй холбон тайлбарлаж ирсэн. Харин Афганы эрх баригчид өөрийн нутаг дэвсгэрийг ийм зорилгоор ашиглуулахгүй гэсэн байр сууриа удаа дараа илэрхийлж байгаа юм.
