Үйл явдал
Чех Улсад суугаа Монгол иргэдийн анхааралд!
Шинэ коронавирусын халдвар дэлхий даяар өндөр хурдацтайгаар тархаж байгаатай холбогдуулан Монгол Улсын Онцгой комиссын 2020 оны 3 дугаар сарын 10-ны өдрийн хуралдаанаас Монгол Улсад орох болон гарах бүх нислэгийг тодорхой хугацаагаар /2020.03.11-2020.03.28 хүртэл/ түр зогсоох шийдвэр гаргасантай холбогдуулан ХБНГУ-ын Берлин хотоор дамжин яаралтай эх орондоо буцах хүсэлтэй иргэдийг тусгай үүргийн /өдрийг жич зарлана/ онгоцоор авахаар ажиллаж байгаатай холбогдуулан 2020 оны 3 дугаар сарын 28-нийг хүртэл Монгол Улсад яаралтай буцах шаардлагатай байгаа иргэд ЭСЯ-нд 2020 оны 3 дугаар сарын 13-ны өдрийн 15.00 цаг хүртэл нэн яаралтай бүртгүүлнэ үү.
Улсын Онцгой комиссын шийдвэрээр дараах иргэдийг нэн тэргүүнд тусгай үүргийн онгоцоор буцаахаар төлөвлөж байна.
- Жирэмсэн эхчүүд
- Бага насны хүүхэд
- Хөгжлийн бэрхшээлтэй иргэд
- Өндөр настан /60-аас дээш насны/
Хүсэлт гаргасан иргэд холбоо барих утас, дараах баримт бичгийг бүрдүүлж, сканнераар оруулан /гар утсаар авсан зураг тооцогдохгүй/ ЭСЯ-ны prague3@mfa.gov.mn цахим хаягаар явуулна. Баримт бичиг гэдэгт дараахыг ойлгоно.
1. Эх орондоо буцах хүсэлтэй иргэний бичгээр гаргасан өргөдөл, гадаад паспорт, гадаад паспортын визтэй хуудас, хилээр нэвтэрсэн тэмдэг бүхий хуудас хавсаргана.
Өргөдөлд дараах агуулгыг тусгасан байна.
• Яаралтай буцах шалтгаанаа тодорхой бичсэн байна.
• Бүртгүүлсэн иргэн Монгол Улсад очсоны дараа 14 хоног өөрийн зардлаар тусгаарлагдах тухай хүлээн зөвшөөрсөн байна. Тусгаарлагдах байр, хоолны зардал өдөрт 50000-70000 төгрөг байна. /Уг нотолгоо баримтын агуулгын хувьд нутаг буцсаны дараа тусгаарлагдах, холбогдох горимыг чанд мөрдөх, төлбөрийг бүрэн барагдуулах, зөрчсөн тохиолдолд хуулийн хариуцлага хүлээхийг хүлээн зөвшөөрсөн байна/
• Дээр дурдсан өргөдөл/нотолгоонд сүүлийн 14 хоногийн хугацаанд тухайн иргэнд халуурах, ханиалгах зэрэг халдварт өвчний шинж тэмдэг илэрсэн эсэхийг тодорхой бичсэн байна.
Эхний ээлжинд Чех Улсад богино хугацааны буюу 90 хүртэл хоногийн визээр зорчсон дээр дурдсан хүндэтгэн үзэх шалтгаантай иргэдийг нэн тэргүүнд хамруулахаар төлөвлөж байгаа бөгөөд ЭСЯ-ны уг өргөдлийг Берлин дэх МИАТ ХК-ийн төлөөлөгчид шилжүүлж, эцсийн шийдвэрийг тээвэрлэгч компани гаргана. /тусгай үүргийн онгоцны зорчигчийн тоо хязгаартай учир/
Нислэгээр явахаар шийдэгдсэн иргэдийн нэрсийг МИАТ ХК гаргах бөгөөд уг мэдээллийг иргэнд МИАТ ХК /Берлин дэх МИАТ ХК-ийн төлөөлөгчөөс лавлах/ мэдэгдэнэ.
Жич: Берлин-Улаанбаатар чиглэлийн нислэгийн билетын үнэ 511 ам. доллар /өмнө нь МИАТ-ын нислэгийн захиалгатай, билеттэй иргэдэд хамаарахгүй/
Монгол Улсаас Бүгд Найрамдах Чех Улсад суугаа Элчин сайдын яам
Үйл явдал
ЦУОШГ: Ихэнх нутгаар их бороо орох тул үерийн аюулаас сэрэмжтэй байхыг анхааруулж байна
Өнөөдөр (2026.08.19) Булган, Орхон, Сэлэнгэ, Дархан-Уул аймгийн нутгаар их бороо орох тул голын усны түвшин нэмэгдэх, нөөлөг салхи, мөндөр, аянга цахилгаан, үерийн аюулаас сэрэмжтэй байхыг онцгойлон анхааруулж байна.
Иргэд, аялагч та бүхэн үер, усны аюулаас урьдчилан сэргийлж:
- Мэргэжлийн байгууллагаас өгч байгаа заавар, зөвлөмжийг дагаж мөрдөх
- Үерийн аюултай бүс, голын эрэг, хуурай сайр жалгаар зорчихгүй байх
- Тээврийн хэрэгслээр зорчихдоо баталгаат гүүр, гармаар зорчих
- Хүүхдийг гол, нуур, үерийн усны ойролцоо хараа хяналтгүй орхихгүй байх
- Үерийн эрсдэлтэй бүсэд буудаллах, майхан барихаас татгалзах
Цаг агаарын мэдээ, сэрэмжлүүлгийг тухай бүрт хүлээн авч, өөрийн болон гэр бүлийнхээ аюулгүй байдлыг хангахыг зөвлөж байна.
Үйл явдал
COP17-д хоол, хүнсний үйлчилгээ үзүүлж буй 30 байгууллагад зөвлөн тусалж байна
ХХААХҮЯ, НХХААГ, НМЭГ-ын улсын болон ахлах байцаагчид Цөлжилттэй тэмцэх тухай НҮБ-ын Конвенцын Талуудын 17 дугаар Бага хурал (COP-17)-ын хүрээнд Цэнхэр, Ногоон бүсэд үйл ажиллагаа явуулж буй 30 аж ахуйн нэгж, байгууллагын хоол үйлдвэрлэл, үйлчилгээний үйл ажиллагаанд энэ сарын 17-ны өдрөөс эхлэн зөвлөн туслаж ажиллаж эхэллээ.
Тухайлбал, улсын байцаагчид хоол хүнсний чанар, аюулгүй байдал, хүнсний түүхий эд, бүтээгдэхүүний хадгалалт, хэрэглэх хугацаа, хоол үйлдвэрлэлийн технологийн үйл ажиллагаа, хадгалалтын температурын горим, тоног төхөөрөмж, багаж хэрэгслийн цэвэрлэгээ, халдваргүйтгэл, ажилтнуудын хувийн болон үйлдвэрлэлийн эрүүл ахуй нөхцөл байдал чиглэлээр зөвлөн тусалж байна.
Мөн Катерингийн үйлчилгээний хүрээнд бэлэн хоол, хүнсний бүтээгдэхүүн тээвэрлэж буй авто тээврийн хэрэгслийн эрүүл ахуй, ариун цэвэр, температурын горим, тээвэрлэлтийн нөхцөл, түүнчлэн лац ломбын бүрэн бүтэн байдлыг шалгаж, аюулгүй байдлыг хангуулах, илэрсэн зөрчил, дутагдлыг газар дээр нь арилгуулах, хүнсний аюулгүй байдал, эрүүл ахуйн шаардлагыг хангах талаар мэргэжил, арга зүйн зөвлөгөө өгч, хэрэгжилтийг хангуулан ажиллаж байна.
Үйл явдал
ОБЕГ НҮБ-Хабитаттай хот суурин газрын гамшгийн эрсдэлийг бууруулах чиглэлээр хамтарна
Онцгой байдлын ерөнхий газрын дарга, хошууч генерал Г.Ариунбуян COP17-д оролцож буй НҮБ-ын Хүн амын нутагшил, суурьшлын хөтөлбөрийн Ази, Номхон далайн бүсийн төвийн хөтөлбөрийн ажилтан Рой Кититэй хоёр талт уулзалт хийлээ.
Уулзалтаар хот суурин газрын гамшгийн эрсдэлийг бууруулах, иргэдийн гамшгийг даван туулах чадавхыг бэхжүүлэх, болзошгүй эрсдэлээс хамгаалах чиглэлээр хамтын ажиллагаагаа өргөжүүлэх талаар санал солилцжээ.
Түүнчлэн НҮБ-Хабитат хөтөлбөртэй хамтран хот суурин газрын гамшгийн эрсдэлийг бууруулах чиглэлээр шинэ төсөл, хөтөлбөр хэрэгжүүлэх боломжийг хэлэлцсэн байна.
Хошууч генерал Г.Ариунбуян Монгол Улсын Онцгой байдлын байгууллага болон НҮБ-ын хамтын ажиллагаа 2004 оноос эхлэлтэйг уулзалтын үеэр онцолжээ. Тухайн үед Монгол Улсын Засгийн газрын хүсэлтээр НҮБ-ын Гамшгийн үнэлгээ, зохицуулалтын баг Монгол Улсад ажиллаж, гамшиг, осолтой тэмцэх үндэсний чадавхад хөндлөнгийн үнэлгээ хийсэн байна.
Өдгөө Онцгой байдлын байгууллага НҮБ-ын Монгол дахь Суурин зохицуулагчийн газар болон НҮБ-ын төрөлжсөн байгууллагуудтай гамшгийн эрсдэлийг бууруулах, гамшгийн хор уршгийг арилгах, хүмүүнлэгийн тусламж үзүүлэх чиглэлээр хамтран ажиллаж байгаа юм.
Энэ удаагийн уулзалтаар талууд хамтын ажиллагааг хотын гамшигт тэсвэртэй байдлыг нэмэгдүүлэх, иргэдийн бэлэн байдлыг сайжруулах бодит төсөл, хөтөлбөрөөр өргөжүүлэх боломжийг онцлон хэлэлцжээ.
