Дэлхий нийтээр..
Өрхийн эмнэлгийн 30 эмчтэй уулзаж, тулгамдаж буй асуудлыг хэлэлцэв
Монгол Улсын Ерөнхий сайд Л.Оюун-Эрдэнэ, Эрүүл мэндийн сайд С.Чинзориг, Нийслэлийн Засаг дарга бөгөөд Улаанбаатар хотын Захирагч Д.Сумъяабазар нар холбогдох албаныхны хамт өрхийн эрүүл мэндийн төв /ӨЭМТ/-ийн эмч нартай “Өглөөний уулзалт” хийлээ. Энэ үеэр "Шинэ сэргэлтийн бодлого"-ыг танилцуулж, анхан шатны тусламж үйлчилгээнд тулгамдаж буй асуудал, шийдвэрлэх арга замын талаар эмч нарын байр суурийг сонсон, эрүүл мэндийн салбарын шинэчлэл, бодлого, хөтөлбөрт тусгахаар санал солилцсон юм.
Уулзалтад санамсаргүй түүврийн аргаар сонгогдсон нийслэлийн 25, орон нутгийн таван ӨЭМТ-ийн эмч оролцсон. Эмч нарын хувьд тулгамдаж буй асуудал нь санхүүжилт гэдгийг онцлоод, программ хангамжийн системүүд хоорондоо холбогдоогүй, боловсон хүчин, тэр дундаа ерөнхий мэргэжлийн эмч ховордсон гэдгийг хэлж байлаа. Мөн барилга байгууламжийн чанарт анхаарах, салбар дундын зохицуулалт чухлыг, ингэж байж нийгмээрээ эрүүл мэндийн боловсролоо дээшлүүлж, урьдчилан сэргийлэх үзлэгт хамрагддаг болно. Түүнчлэн түр оршин суугчдад зориулсан төсөв байдаггүй нь бүхий л нөхцөлд хүндрэл учруулдаг гэдгийг онцолж байлаа.
Ерөнхий сайд Л.Оюун-Эрдэнэ:
-“Өглөөний уулзалт”-ын зорилго нь асуудлыг олон талаас нь харахад чиглэж байгаа. Гаргасан бодлого анхан, дунд шатанд хэрхэн хэрэгжиж байна вэ гэдэг гол асуудал. Ихэнх бодлого дээрээс гараад анхан, дунд шатанд гацчихдаг. Тиймээс бодлого доороосоо гарах хэрэгтэй байна. Мөн бодлого тодорхойлогч нар асуудлыг бодитой харах ёстой. Эмч нарын программ хангамжийн асуудлыг шийдэх хэрэгтэйг ойлголоо. Үүнд Засгийн газрын түвшинд анхаарал хандуулъя. Мөн байр, автомашины асуудлыг судалж, нэгдсэн байдлаар шийдье хэмээсэн юм.
Эрүүл мэндийн сайд С.Чинзориг "Өрхийн эрүүл мэндийн төвийн тусламж, үйлчилгээний эрх зүйн орчны шинэчлэл" сэдэвт илтгэл танилцуулж, цаашид гүйцэтгэлд суурилсан санхүүжилтийн тогтолцоог илүү ил тод болгох, шалгуур үзүүлэлтийг бодит байдалд нийцүүлэх, нийгмийн эрүүл мэнд болон анхан шатны тусламж үйлчилгээний санхүүжилтийг нэмэгдүүлэх зохицуулалт хийнэ" гэдгийг хэлэв.
Нийслэлийн Засаг дарга бөгөөд Улаанбаатар хотын Захирагч Д.Сумъяабазар:
-Салбар бүрийг хамарсан уулзалтыг долоо хоног тутам зохион байгуулж байна. Эдийн засгаа тэлж байж боловсрол, эрүүл мэндийн салбарын цалин, тэтгэвэр, тэтгэмжийг нэмэх, нийгмийн асуудлыг шийдэх боломж бүрдэнэ. Түр оршин суугчдын асуудлын хувьд хууль зүйн үндэслэлтэйгээр зохицуулалт хийх нь зөв. Хөдөөгийн сэргэлтийг бий болгож, тэнд ажиллаж байгаа хүмүүсийн цалинг нэмснээр хот, хөдөөгийн тэнцвэр, хөгжлийн асуудлыг шийднэ. Сонгинохайрхан дүүрэг л гэхэд 43 хороотой ч 26 ӨЭМТ үйл ажиллагаа явуулж байна. Зарим хороо дундаа эмнэлэгтэй. Төсөв, боловсон хүчин, урсгал зардлын асуудал хөндөгддөг. Асуудлыг нэг дор бүгдийг шийдэх боломжгүй учир үе шаттай шийднэ. Засгийн газар Улаанбаатар хотын тулгамдсан асуудлыг шийдэхэд ихээхэн анхаарал хандуулж байгаа" хэмээв. Мөн Улаанбаатар хотод үйл ажиллагаа явуулж байгаа эрүүл мэндийн анхан шатны нэгжид тулгамдаж байгаа асуудлыг үе шаттай шийдэж, бүх талаас нь дэмжинэ гэдгээ илэрхийллээ.
Баянзүрх дүүргийн 24-р хорооны "Мараната" ӨЭМТ-ийн их эмч Э.Алтанзул:
-Манай эмнэлэг 15 эмч, ажилтантай, 9035 хүнд эрүүл мэндийн анхан шатны тусламж үйлчилгээ үзүүлдэг. Манай үйлчлүүлэгчид 100 хувь гэр хорооллынх, зорилтот бүлгийн иргэн олонтой. Анхан шатанд олон төрлийн программ хэрэглэдэг, ачаалал ихтэй, гацдаг. Мөн хорооныхоо барилгын нэг талд үйл ажиллагаа явуулдаг нь халдвар гарах эрсдэлийг бий болгож байна гэдгийг онцолж байв.
Налайх дүүргийн 3, 5-р хорооны “Ачлал-Налайх” ӨЭМТ-ийн их эмч Ц.Бямбасүрэн уламжлалтын эмчийг ӨЭМТ-д ажиллах нөхцөлийг дэмжиж, мөн гэр бүлээрээ төсвийн байгууллагад ажилладаг бол нийгмийн асуудлыг шийдэж өгөхийг хүссэн юм. Түүнчлэн эмнэлгийн байр дусаал гоожихоос гадна өвөл галладаг гэдгийг хэлж байлаа.
Баянзүрх дүүргийн 10-р хорооны "Цэн-Оюу" ӨЭМТ-ийн эмч Д.Солонго өрхийн эмчийг бэлтгэхэд анхаармаар байна. Мөн өрхийн эмнэлэгт 10 жил ажиллах хугацаанд нь зургаан жил түр оршин суугчаар явж байгаа хүн бий. Иймд энэ хүмүүст зориулсан санхүүжилтэд анхаарал хандуулах хэрэгтэйг онцлов.
Ерөнхий сайд, Эрүүл мэндийн сайд, Хотын дарга нар эмч нарын асуултад хариулж, тулгамдсан асуудлыг үе шаттай шийдэхээс гадна төрийн албан хаагчдын цалинг ижил түвшинд оруулах, олон салангид тогтолцоог нэгтгэх бодлого баримталж байгааг, мөн хөдөлмөрийн хөлсний доод хэмжээг үе шаттай нэмнэ гэдгийг хэллээ.
Дэлхий нийтээр..
Кушнер: Газын зурвасыг цэрэггүйжүүлэх үйл явц 30 хоногийн дотор эхэлж магадгүй
АНУ-ын Ерөнхийлөгч Дональд Трампын тусгай элч Жаред Кушнер Газын зурвасыг цэрэггүйжүүлэх үйл явцад ойрын 30 хоногт бодит ахиц гарч магадгүй гэж мэдэгдлээ.
Кушнер наймдугаар сарын 17-нд Израилийн Ерөнхий сайд Биньямин Нетаньяхутай Иерусалимд уулзсаныхаа дараа Fox News-т ярилцлага өгөхдөө эхний ээлжид зэвсгийг ашиглалтаас гаргах ажиллагаа эхэлж, дараагийн 60-90 хоногт газар доорх хонгилуудыг хаах ажил урагшилна гэж найдаж байгаагаа илэрхийлжээ.
Кушнер Израильд очихоосоо өмнө Египетэд ХАМАС-ын удирдлагын төлөөлөлтэй уулзсан байна. Тэрбээр ХАМАС зэвсгээ хураалгахтай холбоотой амлалтаа бодит үйлдлээр харуулах шаардлагатайг мэдэгдсэн бөгөөд эс биелүүлбэл Израиль цэргийн ажиллагаагаа үргэлжлүүлэхэд АНУ болон бусад түншээс илүү хүчтэй дэмжлэг авах болно гэж анхааруулжээ.
АНУ-ын дэвшүүлсэн төлөвлөгөөнд Газын зурвасыг цэрэггүйжүүлэх, ХАМАС-ын зэвсгийг хураах, цэргийн зориулалттай дэд бүтэц болон хонгилуудыг устгах асуудал багтаж байгаа юм. Гэвч уг төлөвлөгөөг хэрэгжүүлэх дарааллын талаар талуудын байр суурь зөрүүтэй хэвээр байна.
Израилийн тал ХАМАС бүрэн зэвсгээ хураахаас өмнө Газын зурвасаас цэргээ гаргахгүй гэсэн байр суурьтай байгаа бол ХАМАС Израилийн цэргийн ажиллагааг зогсоож, цэргээ татах асуудлыг эн тэргүүнд тавьж байна. Кушнерийн хоёр өдрийн уулзалтуудын дараа ч энэ үндсэн зөрүүг арилгасан тохиролцоонд хүрээгүй гэж Reuters мэдээлжээ.
Кушнер мөн Газын зурвасыг цэрэггүйжүүлэхээс өмнө өргөн хүрээний сэргээн босголтыг эхлүүлэхгүй гэсэн АНУ-ын байр суурийг илэрхийлсэн байна. Үүний зэрэгцээ Израильд бодит аюул тулгарсан нөхцөлд өөрийгөө хамгаалах эрхийг нь АНУ хязгаарлахгүй гэж мэдэгджээ.
Уулзалтын үр дүнд Газын зурвасын аюулгүй байдал, зэвсэг хураах асуудал, мөн дэд бүтэц, нийгмийн эрүүл мэндийн асуудал хариуцах хоёр ажлын хэсэг байгуулахаар тохирсон ч энхийн төлөвлөгөөг хэрэгжүүлэх талаар талууд эцсийн тохиролцоонд хүрээгүй байна.
Дэлхий нийтээр..
Иран АНУ-ын цэргийг Ормузын хоолой, Персийн буланд нэвтрүүлэхгүй гэв
Ираны Зэвсэгт хүчний Ерөнхий командлагч Амир Хатами АНУ-ын цэргийн хүчнийг Персийн булан, Оманы булан болон Ормузын хоолойн бүсэд эргэн байршихыг Иран зөвшөөрөхгүй гэж мэдэгджээ.
Хатами наймдугаар сарын 16-нд Тегеранд болсон арга хэмжээний үеэр сэтгүүлчидтэй уулзахдаа АНУ-ын цэргийн хүчийг бүс нутгаас шахан гаргах нь нэгэнт бодит болсон гэж мэдэгдсэн байна. Тэрбээр АНУ-ын цэргийн бааз, хүчний байрлал өмнөх байдалдаа эргэн орох боломжгүй бөгөөд Иран үүнийг зөвшөөрөхгүй гэсэн байр суурь илэрхийлжээ.
Энэ мэдэгдэл АНУ-ын Ерөнхийлөгч Дональд Трамп Ормузын хоолойн хяналтын талаар удаа дараа хатуу байр суурь илэрхийлж буй үед гарч байна. Трамп наймдугаар сарын 12-нд АНУ Ормузын хоолойг “бүрэн хянаж байгаа” гэж мэдэгдсэн бол наймдугаар сарын 14-нд Ираныг ялсны дараа тус хоолойг АНУ-ын нутаг дэвсгэр болгон зарлах тухай ярьсан юм.
Хатами Трампын мэдэгдлийг няцааж, Ормузын хоолой дахь Ираны байр суурийг хамгаална гэдгээ илэрхийлжээ. Түүний мэдэгдэлд АНУ-ын цэргийн хүч бүс нутагт эргэн байрших аливаа оролдлогод Иран хатуу хариу үзүүлнэ гэсэн агуулга багтсан байна.
Түүнчлэн Хатами АНУ-ын цэргийн алба хаагчийг байлдааны нөхцөлд хөнөөсөн эсвэл олзолсон тохиолдолд 30 мянган ам.долларын шагнал олгохоо мэдэгдсэн байна. Ираны төрийн мэдээллийн хэрэгслүүдийн мэдээлснээр шагналын хөрөнгийг иргэдийн хандиваар бүрдүүлэх бөгөөд эмэгтэй хүн ийм үйлдэл хийсэн тохиолдолд шагналыг хоёр дахин нэмэгдүүлж, 60 мянган ам.доллар болгоно гэжээ.
Ормузын хоолойн хяналт АНУ, Ираны хоорондын сөргөлдөөний гол асуудлын нэг хэвээр байна. Трампын засаг захиргаа АНУ-ын Тэнгисийн цэргийн хүчин хоолойг хянаж байгаа гэж мэдэгдэж байгаа бол Ираны тал стратегийн усан зам дахь өөрийн байр суурийг хадгалсаар байна. Наймдугаар сарын 18-ны байдлаар ч талуудын байр суурь зөрүүтэй хэвээр бөгөөд Ормузын хоолойн хөдөлгөөн бүрэн хэвийн болоогүй байна.
Дэлхий нийтээр..
Путин гадаадад гарч, ял шийтгэлээс зайлсхийсэн иргэдийн хөрөнгийг битүүмжлэх хуульд гарын үсэг зуржээ
ОХУ-ын Ерөнхийлөгч Владимир Путин гадаадад байгаа бөгөөд Оросын шүүхээс оноосон ял шийтгэлээс зайлсхийж буй иргэдэд тодорхой хязгаарлалт тогтоох тухай хуульд 2026 оны зургаадугаар сарын 10-нд гарын үсэг зуржээ. Шинэ хууль 2026 оны есдүгээр сарын 1-нээс хүчин төгөлдөр хэрэгжиж эхэлнэ.
Шинэ зохицуулалтаар гадаадад байгаа ОХУ-ын иргэн хуульд заасан тодорхой гэмт хэрэгт холбогдож, шүүхийн шийдвэрийг биелүүлэхээс зайлсхийсэн тохиолдолд түүний ОХУ дахь хөрөнгө, эд хөрөнгийг битүүмжлэх болон бусад хязгаарлалт хэрэглэх эрх зүйн боломж бүрдэж байна.
Хууль нь ОХУ-аас гадаадад гарсан бүх иргэнийг хамруулахгүй. Мөн Украины дайн эхэлснээс хойш эх орноосоо явсан хүмүүсийг нийтээр нь иргэншлээс хасах зохицуулалт биш юм.
Харин гадаадад байгаа бөгөөд ОХУ-ын хууль тогтоомжид заасан тодорхой гэмт хэрэгт холбогдсон, шүүхийн ажиллагаа болон оноосон шийтгэлээс зайлсхийж буй иргэдэд дотоодод байгаа хөрөнгө, эд хөрөнгөөр нь дамжуулан хязгаарлалт тавих боломжийг өргөжүүлжээ.
Уг хуулийг ОХУ-ын Төрийн Дум тавдугаар сарын 26-нд баталж, Холбооны зөвлөл зургаадугаар сарын 3-нд дэмжсэн бөгөөд Ерөнхийлөгч Владимир Путин зургаадугаар сарын 10-нд гарын үсэг зурсан юм. Хуулийн үндсэн зохицуулалтууд есдүгээр сарын 1-нээс хэрэгжиж эхлэхээр тусгажээ.
ОХУ 2022 онд Украинд цэргийн ажиллагаа эхлүүлснээс хойш олон тооны иргэн гадаадад гарсан бөгөөд Москва гадаадад байгаа Оросын иргэдийн хууль зүйн хариуцлагатай холбоотой зохицуулалтаа үе шаттайгаар чангатгаж ирсэн юм.
Гэхдээ гадаадад амьдарч байгаа явдал өөрөө хариуцлага хүлээлгэх үндэслэл болохгүй бөгөөд хуульд заасан гэмт хэрэг, шүүхийн ажиллагаанаас зайлсхийсэн зэрэг тодорхой нөхцөл бүрдсэн тохиолдолд шинэ зохицуулалтыг хэрэглэхээр байна.
